اي حد بيدور على شغل بيبقى عنده استعداد يعمل اي حاجة عشان يشتغل! وده للاسف اللي بيلعبوا عليه شركات كتير هدفها النصب واستغلال الحاجة للشغل!
وعشان ماتقعش في فخهم، وزارة القوى العاملة في مصر قدمت بعض النصايح لاي حد عاوز يشتغل برة من غير مايتنصب عليه .. لخصناها ليكم في البوست ده .. اقرا البوست للاخر واعمل شير عشان تفيد غيرك

1- ماتصدقش اي شركة تقولك هات فلوس عشان نطلع لك تأشيرة العمل .. لأن تكاليف الاستقدام بيتحملها صاحب العمل .. ولو حصل وهتديهم فلوس خلاص اوعى تمضي على ورقة بتقول انهم ماخدوش منك فلوس .. ساعتها اتأكد ان ده نصب ولو مضيت مش هتعرف تثبت حقك بعد كده.

2- ماتمضيش على اي شيكات ولا ايصالات امانة بحجة انهم عاوزين يضمنوا جديتك حتى لو ادولك التأشيرة في ايدك .. ممكن الفيزا تكون مزورة ومش هتكتشف غير وانت مسافر وساعتها هتبقى وقعت في الفخ خلاص.

3- ماتتعاقدش على شغل برة غير من خلال وزارة القوى العاملة او شركات الحاق العمالة بالخارج المرخصة من وزارة القوى العاملة .. لان دول بيتعمل ليهم تفتيش بشكل دوري. عشان كده قبل اي حاجة استعلم عن الشركة اللي مقدمالك شغل واتأكد انها رسمية وموثقة.

4- مفيش حاجة اسمها "هنطلعلك تأشيرة حرة وانت هناك تدور على شغل" .. في بلاد قانونها بيمنع ده اصلا … لو عاوز تسافر لازم تبقى مظبط شغلك واقامتك ومرتبك.

5- التأشيرة السياحية للزوار والسياح مابتسمحش بالعمل في الدولة .. ولو طلعتهم عشان تدور على شغل لازم تبقى عارف ان الموضوع هيكون مكلف ليك لان التدوير على شغل هياخد وقت طويل.

6- لما تجيلك تأشيرة عمل لازم تتأكد انها سليمة ومعتمدة عن طريق انك تروح الإدارة العامة للتشغيل والتمثيل الخارجي بوزارة القوى العاملة عشان تراجعها، وعامة تقدر تستفسر عن أي عرض أو عقد عمل أو إذن دخول من وزارة القوى العاملة بالقاهرة عشان تتأكد انك في السليم.

#فرصنا #فرص_شغل_بجد




Source

  • شارك هذا المنشور

اترك تعليقا